Besøkssenter verdsarv i Geiranger

Kvifor er fjella så høge og fjorden så djup? Korleis klarte folk seg vinteren gjennom på ei einsam fjellhylle? Trivst det blomar der rasa går? Kva skjer når fjellskredet på Åknest går og flodbølgja kjem inn fjorden?

I hovudutstillinga får du sjå korleis det mektige landskapet blei til, og korleis naturkreftene framleis verkar på det. Du blir kjend med flora og fauna og får innsikt i dei små og store prosessane i naturen. På vandringa gjennom senteret går du hundre år tilbake i tid, opplever bygningar og gardsreiskapar, sjekkar korleis fjordabåten ruggar og får kjenne «gufset» frå snøfonna som sopar ned dei bratte fjellsidene.

På Norsk Fjordsenter i Geiranger kan du oppleve utstillinga ‘Vår verdsarv’, som inviterer deg til å utforske dei åtte norske UNESCO-verdsarvstadene og deira plass i eit globalt nettverk av unike kultur- og naturverdiar.

Ho omfattar både ei utandørs og ei innandørs oppleving. Den utandørs utstillinga er alltid open for publikum, medan den innandørs byr på interaktive trekantforma installasjonar inspirerte av fjella og det norske landskapet.

Kva er verdsarv? Det er ei forplikting til å ta vare på kultur- og naturarv med universell verdi. Utstillinga skal fremje forståing på tvers av kulturar og grenser, og skape engasjement for å verne om vår verdsarv for komande generasjonar.

Saman formidlar utstillingane kunnskap om vern og beskyttelse – og peikar på utfordringane verdsarvstader verda over står overfor i dag.

Utstillinga Fjordafolket heidrar menn, kvinner og born som ein gong forma livet langs fjordane. Gjennom uttrykksfulle bronse­skulpturar blir kvardagslivet levandegjort – frå tunge børelass med høy og stell av husdyr til oppvekst for born i avsides og krevjande omgjevnader. Dette er ei forteljing om motstandskraft, hardt arbeid og det nære samspelet mellom menneske og det dramatiske fjordlandskapet.

Prosjektet vart utvikla av Storfjordens Venner, ein foreining stifta i 1975 som har restaurert meir enn 150 fjordgardar og teke vare på kulturlandskap langs Storfjorden. Deira langsiktige arbeid bidreg til å bevare denne unike kulturarven, som er ein viktig del av Geirangerfjorden verdsarvområde. Les meir om Storfjordens Venner: her

Skulpturane vart laga av skulptør Ola Stavseng. Den 6. september 2025 vart utstillinga offisielt opna av H.M. Dronning Sonja.

Gjennom ei biletreise i fjordlandskapet tek vi deg med gjennom verdsarvområdet i skiftande årstider. Stemningsfull musikk forsterkar dei vakre og dramatiske bileta. Her kan du roe deg heilt ned og kjenne deg i eitt med naturen, og du kan få ein god pause i eit travelt reiseprogram.

Vi utviklar med jamne mellomrom nye produkt som vi vil vise fram i den moderne kinosalen vår. Gled deg til desse! Salen har eit uvanleg stort boge lerret og solid framvisingsutstyr og eignar seg godt både til kulturopplevingar og konferansar. I salen er det hundre sitjeplassar plasserte i amfi, så her ser alle både lerret og scene godt.

Vi ønskjer å vere med på å gi barn og unge det beste grunnlaget for å skjøtte verdsarv-verdiane i framtida. I utstillinga frå Fjordheimen møter vi isbreane, elvane og steinane som artige skapningar: Gaute Gneis viser deg alle dei flotte steinvennene sine, og du kan krype inn i magen på Moder Mantel og høyre henne fortelje om korleis fjordlandskapet vart til.

Dette er ikkje berre ei utstilling, men mest av alt eit aktivitetsrom der du kan forske, leike, undre deg og kanskje lære noko nytt. Her prøver vi å la naturen sjølv fortelje.

I eit særprega lokale med utsyn rett mot fjorden har vi dei siste åra vist fram utvalde kunstutstillingar. Kunstutstillingane har tema som er knytte til verdsarven, natur eller kulturverdiar.

I eit anna rom viser vi fram varierte temautstillingar. Desse spenner over eit breitt spekter: Det kan vere ambulerande utstillingar knytte til aktuelle tema, utstillingar vi sjølve produserer, eller prosjekt vi har samarbeidd med skulane om. Ta gjerne kontakt med oss dersom du har gode tips, eller kan vere ein samarbeidspartnar i eit utstillingsprosjekt.

Når inntrykka er mange, er det godt å setje seg ned på ein hyggeleg stad og nyte eit lite måltid. I kafeen vår får du kjøpe kaffi og anna god drikke, og nyte gode småretter laga av lokale råvarer.

Du kan også sikre deg ferdaminne frå verdsarven som du finn berre her. Når du gler deg sjølv eller dine kjære med ein slik suvenir, hjelper du oss også til å ta vare på og utvikle verdsarvområdet vidare.

Norsk Fjordsenter ligg vakkert til på ei lita høgde over fjorden, i hjartet av Geiranger. Det er lett å kome seg hit med bil eller buss, og du kan òg nyte ei oppkvikkande elvevandring frå fjorden og opp til Besøkssenteret.

Fossevandringa er ei oppleving same kva årstid du kjem – det friske vatnet i elva og dei flotte trappene får det til å bruse i blodet. Vi har eit fint tilrettelagt uteområde med bålplass og leikeplass for barna. Her er ein natursti, du kan lage byggverk med hesjestaur, eller nytte volleyballbanen. Kanskje har du lyst å prøve deg på «Kubb» eller andre utespel?

Her er utandørs toalett som er opne heile døgnet i sommarhalvåret. På parkeringsplassen har vi ladestasjon for el-bil.

Norsk Fjordsenter ligg omtrent 1 km frå bygdesenteret med 327 trappetrinn og ein høgdeskilnad på 85 m.